சிரியாவில் இனிமேலும் ரசாயன தாக்குதல் நடத்தினால், அந்த நாட்டின் ஏவுகணை தாக்குதல் நடத்துவோம் என அமெரிக்கா எச்சரிக்கை விடுத்துள்ளது.

சிரியாவில் அதிபர் பஷீர் அல் ஆசாத்துக்கும், கிளர்ச்சியாளர்களுக்கும் இடையே கடந்த 8 ஆண்டுகளாக உள்நாட்டுப்போர் நடைபெற்று வருகிறது. இந்த போரில் இதுவரை லட்சகணக்கான அப்பாவி மக்கள் கொல்லப்பட்டுள்ளனர். இந்த நிலையில் சிரிய அரசு, கிழக்கு கவுட்டா பகுதியில் உள்ள டவுமா நகரில் கடந்த 7-ம் தேதி நடத்திய ரசாயன ஆயுத தாக்குதலில் 70பேர் பலியானதாக தகவல் வெளியானது.

இதற்கு பதிலடி கொடுக்கும் விதமாக அமெரிக்கா, பிரிட்டன், பிரான்ஸ் நாடுகள் இணைந்து சிரியா மீது நேற்றுமுன்தினம் ஏவுகணை தாக்குதல் நடத்தியது.

இதைத் தொடர்ந்து ரஷ்யாவின் வேண்டுகோளை ஏற்று ஐ.நா. பாதுகாப்பு கவுன்சிலின் அவசர கூட்டம் நேற்றுமுன்தினம் நடைபெற்றது. இதில் சிரியா மீதான தாக்குதலுக்கு கண்டனம் தெரிவித்து ரஷ்யா தரப்பில் தீர்மானம் கொண்டு வரப்பட்டது.

ரஷ்யாவின் தீர்மானத்துக்கு சீனா, பொலிவியா மட்டுமே ஆதரவு அளித்தன. அமெரிக்கா, பிரிட்டன், பிரான்ஸ் உள்ளிட்ட 8 நாடுகள் எதிர்த்து வாக்களித்தன. 4 நாடுகள் வாக்கெடுப்பில் பங்கேற்கவில்லை. இதனால் ரஷ்யாவின் தீர்மானம் தோல்வியடைந்தது.
அப்போது பேசிய அமெரிக்க தூதர் நிக்கி ஹாலே, சிரியா மீது இனிமேலும் ரசாயன ஆயுத தாக்குதல் நடத்தினால், அந்த நாட்டின் மீது மீண்டும் ஏவுகணை தாக்குதல் நடத்த தயார் நிலையில் உள்ளதாக கூறினார்.

இதற்கு பதிலளிக்கும் விதமாக பேசிய ரஷ்ய தூதர் வாசிலி நிபென்ஜியா, அமெரிக்கா இரட்டை வேடம் போடுகிறது. உலகம் உங்களை உன்னிப்பாகக் கவனித்துக் கொண்டிருக்கிறது என்பதை மறந்துவிட வேண்டாம் என்று குற்றம் சாட்டினார்.

சிரியாவில் ரசாயன ஆயுத தாக்குதல் நடத்தப்பட்டதா என்பது குறித்து ஆய்வு செய்ய ரசாயன ஆயுத தடைக்கான அமைப்பின் (ஓ.பி.சி.டபிள்யூ) நிபுணர்கள் தற்போது அந்த நாட்டில் முகாமிட்டுள்ளனர். இதுகுறித்து பேசிய சிரியா அமைச்சர் அயுமான் சூசன், “ஓ.பி.சி.டபிள்யூ நிபுணர்கள் சுதந்திரமாக பணியாற்ற அதிபர் ஆசாத் அரசு உதவும்” என்று தெரிவித்தார்.

(Visited 37 times, 1 visits today)