மலேசியாவின் முன்னாள் பிரதமர் நஜீப் ரஸாக்ஊழல் குற்றச்சாட்டின் பேரில் கைது செய்யப்பட்டுள்ளார்.

மலேசியா நாட்டின் முன்னாள் பிரதமர் நஜீப் ரஸாக்  அந்நாட்டின் நீதித்துறையின் கீழ் இயங்கும் 1எம்டிபி  (1MDB)   என்ற மேம்பாட்டு நிறுவனத்தின் நிதியை முறைகேடாக தனது கணக்குக்கு மாற்றியதாக குற்றச்சாட்டு எழுந்தது. இதன் மூலம் ரூ.4,150 கோடி மதிப்பில் ஊழல் நடைபெற்றிருக்கிறது என்று கூறப்படுகிறது.

இதன் பேரில் சில நாட்களுக்கு முன்பாக அவர் தொடர்புடைய ஆறு இடங்களில் அந்நாட்டு ஊழல் தடுப்புப் பிரிவு அதிகாரிகள் நடத்திய சோதனையில் நஜீப் மற்றும் அவரது மனைவி ரோஸ்மா மன்சூர் ஆகியோருக்குச் சொந்தமான ரூ.200 கோடி மதிப்பிலான பணமும் ரூ1இ800 கோடி மதிப்பிலான பொருட்களும் கைப்பற்றப்பட்டன.

மேலும்  நஜீப் ரஸாக்கின் உதவியாளர் ஒருவரும் கைது செய்யப்பட்டுள்ளார் என்று அந்நாட்டு ஊடகங்கள் செய்தி வெளியிட்டுள்ளன. இந்நிலையில்  இந்த வழக்கில் நஜீப் ரஸாக்கை ஊழல் தடுப்பு அதிகாரிகள் இன்று கைது செய்துள்ளனர் என்று அவரது வழக்கறிஞர் கூறியுள்ளார்.

கடந்த மே 9ஆம் தேதி நடைபெற்ற மலேசியப் பிரதமர் தேர்தலில் நஜீப் ரஸாக் தோல்வியுற்றார். இதனையடுத்து அவரை எதிர்த்து போட்டியிட்ட மகாதிர் முகமது பிரதமராகப் பதவியேற்றார். நஜீப் ரஸாக்கின் முன்னாள் அரசியல் குருவாக இருந்த மகாதிர் முகமது ஆட்சிப் பொறுப்பேற்றது முதல் நஜீப் தொடர்பான ஊழல் வழக்கின் விசாரணை தீவிரமாக நடைபெறத் தொடங்கியது.

இந்த வழக்கு தொடர்பாக மலேசிய வரலாற்றில் இதுவரை இல்லாத அளவுக்கு மிக அதிக அளவில் பணம் மற்றும் பொருட்கள் பறிமுதல் செய்யப்பட்டுள்ளதாக அந்நாட்டு குற்றப்பிரிவு உயர்அதிகாரி ஒருவர் கூறியுள்ளது குறிப்பிடத்தக்கது.

(Visited 47 times, 1 visits today)