அரசின் நிகழ்ச்சி நிரலை சுமந்திரன், மாவை முன்னெடுப்பு; சுரேஷ் பிரேமச்சந்திரன்
2017-06-16 09:29:35 | General

வடமாகாண முதலமைச்சருக்கு எதிரான தமிழரசுக் கட்சியின் செயற்பாடு ஊழ ல்வாதிகளை பாதுகாப்பதற்கான ஒரு செயற்பாடாகவே அமைந்திருக்கிறது எனக்  கூறியிருக்கும்  ஈ.பி. ஆர்.எல்.எவ். வின் தலைவரும் தமிழ்த் தேசியக் கூட்டமைப்பின் முன்னாள் பாராளுமன்ற உறுப்பினருமான சுரேஷ் பிரேமச்சந்திரன், 
முன்னாள் நீதியரசரும் தமிழ் மக்களுக்கு ஊழலற்ற ஓர் நல்லாட்சியைக் கொடுக்கவேண்டும் என விரும்புகின்றவரும் இவற்றுக்கெல்லாம் மேலாக தமிழ் மக்களது தேசிய உணர்வை பிரதிபலிக்கக் கூடிய, தமிழ்த் தேசியக் கூட்டமைப்பின் தேர்தல் விஞ்ஞாபனத்தில் இருக்கக் கூடிய விடயங்களான இராணுவ வெளியேற்றம், வடக்குக் கிழக்கு இணைப்பு, மீள்குடியேற்றம், தமிழ் மக்களுக்கான அரசியல் தீர்வு போன்ற விடயங்களை வலியுறுத்துகின்ற, தமிழ் மக்களுக்கு இடம்பெற்றது இனப்படுகொலையே என வடக்கு மாகாண சபையில் தீர்மானத்தை நிறைவேற்றிய முதலமைச்சர் விக்னேஸ்வரனை, ஊழல் குற்றவாளிகள் மீது நடவடிக்கை எடுத்தார் என்பதற்காக அவர் மீது நம்பிக்கையில்லாத் தீர்மானத்தைக் கொண்டு வந்து அவரை நீக்குவது என்பது மிகமிக அசிங்கமான அநாகரிகமான அரசியல் முன்னுதாரணமாகவே இது அமையும் எனவும் கூறியுள்ளார்.


சமகால அரசியல் நிலைமைகள் குறித்து யாழ்.ஊடக அமையத்தில் நேற்று  வியாழக்கிழமை நடை பெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கும் போதே மேற்கண்டவாறு கூறிய அவர் மேலும்  குறிப்பிடுகையில் ;
வடக்கு மாகாணத்திற்கு ஊழல் அற்ற நல்லாட்சியை வழங்கவே முதலமைச்சர் அமைச்சர்களை பதவி நீக்கியிருந்தார். இவ்வாறு அவர் பதவி நீக்கியது மாகாண சபை உறுப்பினர்களின் கோரிக்கைக்கு அமைவாக நிறுவப்பட்ட விசாரணைக்குழுவின் அறிக்கைகளின் அடிப்படையிலேயே அவர் அம் முடிவை எடுத்திருந்தார்.

இது அவர்களது உரைகளின் ஊடாகவே வெளிப்பட்டு நிற்கின்றது. இவ்வாறான நிலையில் முதலமைச்சர் என்பவர் ஒரு இலட்சத்து 37 ஆயிரத்திற்கும் மேலான வாக்குகளைப் பெற்று மக்களால் தெரிவு செய்யப்பட்டவர். அவ்வாறு அவர் முதலமைச்சர் வேட்பாளராக நிறுத்தப்பட்டமையானது வெறுமனே தமிழரசுக் கட்சியினுடைய விருப்பில் மாத்திரமன்றி அது தமிழ்த் தேசியக் கூட்டமைப்பில் அங்கம் வகிக்கக் கூடிய நான்கு கட்சிகளினதும் சம்மதத்தினுடனேயேயாகும். அத்துடன் அவர் வெல்வதற்கு அனைத்துக் காரணங்களும் இந்த நான்கு கட்சிகளையும் சாரும். 


இத்தகைய நிலையில் தமிழரசுக் கட்சி ஊழல் அற்ற ஓர் ஆட்சியைக் கொண்டு வருவதனை எதிர்த்து, ஊழல் வாதிகளை பாதுகாத்து முதலமைச்சர் மீது நம்பிக்கை இல்லாப் பிரேரணை கொண்டு வருவதானது ஊழல் வாதிகளை பாதுகாக்கின்ற செயற்பாடாகவே அமையும்.

குறிப்பாக இதனை தமிழரசுக் கட்சியின் சுமந்திரன், மாவை, சிறிதரன்  ஆகியோரினது தலைமையிலேயே இந்த ஊழல் வாதிகளை பாதுகாக்க நடவடிக்கை மேற்கொள்ளப்பட்டுக் கொண்டிருக்கின்றது. இதன் ஒரு நடவடிக்கையாகவே நேற்று முன்தினம் இவர்கள் தமக்கு 20 இற்கும் மேற்பட்டோர் ஆதரவு இருப்பதாகக் கூறி முதலமைச்சர் மீதான ஒரு நம்பிக்கையில்லாப் பிரேரணையை ஆளுநரிடம் சமர்ப்பித்திருக்கிறார்கள். 


இந்நிலையில், தமிழரசுக் கட்சியானது தமிழ் மக்களால் உருவாக்கப்பட்ட வடக்கு மாகாண சபை முக்கியமாக முன்னாள் நீதியரசரும் தமிழ் மக்களுக்கு ஊழலற்ற ஓர் நல்லாட்சியை கொடுக்கவேண்டும் என விரும்புகின்றவருமான இவற்றுக்கெல்லாம் மேலாக தமிழ் மக்களது தேசிய உணர்வை பிரதிபலிக்கக் கூடிய, தமிழ்த் தேசியக் கூட்டமைப்பின் தேர்தல் விஞ்ஞாபனத்தில் இருக்கக் கூடிய விடயங்களான இராணுவ வெளியேற்றம், வடக்குக் கிழக்கு இணைப்பு, மீளக்குடியேற்றம், தமிழ் மக்களுக்கான அரசியல் தீர்வு போன்ற விடயங்களை வலியுறுத்துகின்ற தமிழ் மக்களுக்கு இடம்பெற்றது இனப்படுகொலையே என வடக்கு மாகாண சபையில் தீர்மானத்தை நிறைவேற்றிய முதலமைச்சர் விக்னேவரன் மீது ஊழல் குற்றவாளிகள் மீது நடவடிக்கை எடுத்தார் என்பதற்காக நம்பிக்கையில்லாத் தீர்மானத்தை கொண்டு வந்து அவரை நீக்குவது என்பது மிகமிக அசிங்கமான அநாகரிகமான அரசியல் முன்னுதாரணமாகவே  அமையும்.


 தமிழ் மக்களுக்குரிய கடமைகளைச் செய்து கொண்டிருக்கும் ஒருவரை இக் கடமைகளில் இருந்து விலகி வடகிழக்கு இணைப்பைக் கைவிட்டு, சமஷ்டி அரசியல் முறை என்பதைக் கைவிட்டு இலங்கை அரசாங்கத்தின் நிகழ்ச்சி நிரலில் செயற்பட்டுக்கொண்டு இருக்கக் கூடிய தமிழரசுக் கட்சியானது சுமந்திரன், மாவை சேனாதிராஜா போன்றோரை முன்னிலைப்படுத்தியும் தமிழரசுக் கட்சியின் மாகாண சபை உறுப்பினர்களையும் அரச சார்பான இரண்டு சிங்கள மற்றும் மூன்று முஸ்லிம் மாகாண சபை உறுப்பினர்களையும் உள்ளடக்கி ஒரு நம்பிக்கையில்லாத் தீர்மானத்தைக் கொண்டு வருவதானது வெறுமனே தமிழரசுக் கட்சி மாத்திரமன்றி ஐக்கிய தேசியக் கட்சியும் ஸ்ரீ லங்கா சுதந்திரக் கட்சியும் இணைந்துதான் இந்த நம்பிக்கையில்லாத் தீர்மானத்தைக் கொண்டு வர முயற்சிக்கிறார்கள் என்றே எண்ணத் தோன்றுகிறது.  இத்தகைய செயற்பாடானது தமிழ் மக்களை மிகமிக மோசமாகத் தாக்குகின்ற ஒரு செயற்பாடாகும். 


உண்மையில் தமிழ் மக்கள் தமிழ்த் தேசியக் கூட்டமைப்பை அல்லது தமிழரசுக் கட்சியை இத்தகைய காரணங்களுக்காக பாராளுமன்றத்திற்கோ மாகாண சபைக்கோ அனுப்பவில்லை. யுத்தத்திற்குப் பின்னர் தமிழ் மக்கள் தங்களுக்கு 
நீதியான ஒரு நியாயமான நேர்மையான ஆட்சிமுறை ஒன்று அமையவேண்டும் என்பதற்காகவே இவர்களை மக்கள் வெற்றிபெறச் செய்து மாகாண சபைக்கும் பாராளுமன்றத்திற்கும் அனுப்பியிருந்தார்கள். ஆனால் இவ்வாறான ஒரு சூழ்நிலையில் தமிழ் மக்களின் விருப்பத்திற்கு எதிராக செயற்படுவதான ஏற்றுக்கொள்ளமுடியாததொன்று. 


முதலமைச்சரது ஊழல் அற்ற ஆட்சியை உருவாக்க வேண்டும் என்ற கொள்கைக்கு எதிராகச் செயற்பட்டு ஓர் ஆட்சியை உருவாக்குவார்களாயின் மக்கள் அதனை எதிர்ப்பதுடன் அதற்கு எதிராக வீதியில் இறங்கி போராடுவார்கள். இத்தகைய நிலையில் இவர்கள் அரசாங்கத்தின் நிகழ்ச்சி நிரலான தமிழ்த் தேசியக் கூட்டமைப்பினை பிளவுபடுத்துவது, மாகாண சபையை சீர்குலைப்பது, இவற்றின் ஊடாக மத்திக்கு என்ன தேவையோ அதனைச் செய்வது என்பதுவே இவர்களது நோக்கமாகும். 


ஏனெனில், முதலமைச்சர் தொடர்ச்சியாக மத்திக்கு எதிராக பல கோரிக்கைகளை முன்வைக்கின்றார். குறிப்பாக தமிழ் மக்களின் காணி விடுவிப்பு, இராணுவ வெளியேற்றம், காணாமல் போனோர் விடயம் தொடர்பில் அரசாங்கம் சரியான தீர்மானத்தை எடுக்கவேண்டும் போன்ற பல கோரிக்கைகள முன்வைத்துள்ளது.
இவையெல்லாம் நிறுத்தப்பட வேண்டுமாயின் முதலமைச்சர் வெளியேற்றப்படவேண்டும். மாகாண சபை சீர்குலைக்கப்படவேண்டும்.

அப்போதுதான் அரசாங்கத்திற்கு காவடி தூக்கக் கூடியவர்கள் முதலமைச்சராகவும் அமைச்சர்களாகவும் வர முடியும் என்ற நிலை காணப்படுகின்றது. இதனை முன்னிறுத்தியே சுமந்திரன் யாழ்ப்பாணத்தில் நிலைத்து நின்று  இக் காரியங்களை செய்வன. தமிழ் மக்களைக் குழிதோண்டிப் புதைக்கின்ற செயற்பாடாகவே பார்க்க முடியும். ஆனால், இவர்களது நடவடிக்கைக்கு தமிழ்த் தேசியக் கூட்டமைப்பில் அங்கம் வகிக்கக் கூடிய ஏனைய கட்சிகள் இதனை ஏற்கவில்லை என திட்டவட்டமாக வலியுறுத்திக் கூறியதன் பின்னரும் தமிழரசுக் கட்சி தனித்து நின்று செயற்படுவதானது தந்தை செல்வாவின் வழியில் வந்த தமிழரசுக் கட்சியா இதனைச் செய்கின்றது என்ற கேள்வியை எழுப்பியுள்ளது.

ஒரு நேர்மையாளனது வழியில் வந்த கட்சி இன்று அரசாங்கத்தின் நிகழ்ச்சி நிரலுக்காக தமிழ் மக்களை சீர் குலைக்கின்ற, மாகாண சபையைச் சீர்குலைக்கின்ற தமிழரசுக் கட்சியின் இச் செயற்பாடு கண்டிக்கப்படக் கூடிய ஒன்று. எனவே நாங்கள் இவர்களைக் கோருவது இவர்கள் இச் சந்தர்ப்பத்திலாவது இவற்றிலிருந்து விலகியிருக்க வேண்டும். தமிழ் மக்களுக்கு ஊழலற்ற ஓர் ஆட்சியைக் கொண்டு வர இவர்கள் உதவ வேண்டும். மாறாக ஊழல்வாதிகளைக் காப்பாற்ற இவர்கள் முனைவார்களாயின் தமிழரசுக் கட்சியைச் சேர்ந்தவர்கள் அனைவரும் ஊழல் வாதிகளாகவே பார்க்கப்படுவார்கள்.

இந்நிலையில் இவர்கள் ஊழல் வாதிகளாக இருக்கப்போகிறார்களா ? அல்லது ஊழல்வாதிகளை எதிர்ப்பவர்களாக தமிழ் மக்களுக்கு ஊழல் அற்ற ஆட்சியை வழங்கப்போகின்றவர்களாக இருக்கப்போகிறார்கள் என்பதை இவர்கள் தீர்மானிக்கின்ற தருணம் ஏற்பட்டுள்ளது. இல்லாவிடின் இவர்கள் ஊழல் வாதிகளை ஆதரிப்பவர்களாக இருப்பின், இவ்வாறான ஒரு தமிழரசுக் கட்சியுடன் இணைந்து செயற்பட முடியுமா? என்ற ஒரு சிந்தனையையும் எமக்குத் தோற்றுவிக்கின்றது.


எனவே, இந்த இறுதி நேரத்திலாவது தமிழரசுக் கட்சி தான் விட்ட தவறுகளைத் திருத்திக் கொள்ள வேண்டும். இதற்கு சம்பந்தன் இதனைக் கவனத்தில் எடுத்து சரியான நடவடிக்கை மேற்கொள்ள வேண்டும். இல்லாவிடின் எல்லாப் பிரச்சினைகளுக்கும் சம்பந்தன், சுமந்திரன், மாவைசேனாதிராசா போன்றோரே காரணம் என்ற நிலை தமிழ் மக்களுக்கு ஏற்படும் இதனை அவர்கள் ஏற்படுத்தக் கூடாது .

TOTAL VIEWS : 1792
comments
NAME :
YOUR NAME IS REQUIRED.
EMAIL :
YOUR EMAIL ADDRESS IS REQUIRED.
INVALID EMAIL ADDRESS.
NOT FOR PUBLICATION
 
ADD YOUR COMMENT.
  ENTER THE TEXT HAS SHOWN
2vpgd
  PLEASE ENTER CAPTA VALUE.